اتخنقت ...
من كل أوضه في قلبي بتفتح عينيها
تفتح لصبح جديد شباك عليها
تدخل عصافير الشتا
و توزع الخبر الحزين
تخفي ملامح حزنها و الجوع بيكوي قلبها
تشرب القهوة اللي باتت فى الفناجين
الكتير فوق الكراسي ..
فوق الشبابيك اللى نامت
بين ايدين الدجالين
عمرك الليله اتقرى
هتروح في سكة مش طويله .. قصيره
تركب الخيل المسافر بين عينيها
تخطفك تقطف ورودك
تزرع الشوك اللي نابت بين خدودك
بستان حرير
أرقام كتير تاهت ما بين حلمك و تحقيق المصير
تركب طموحك يهلكك
تركب خسارتك تملكك
تركب حمول الدنيا فوق ضهرك تهدك ..
تحني خطوة بين قلبك و بين حلمك
تطول السما في لحظتين
تنزل على الأرض في أقل من الدقيقه
و تقول تاني اتخنقت..
.من قلبي و من أوضه اللي ضاقت على الحزن اللي ساكن أرضها
فوق الحيطان اللى دبل لونهاو شرخها الزمن
وقعت على الحلم اتكسر
دابت حدود الوحده فيها
عملت البيت الكبير
اللي سكنت الليلة فيه و غنيت "اتخنقت ".
ليست هناك تعليقات:
إرسال تعليق